អន្តរជាតិ៖ ប្រទេសចិនព្រមាននៅថ្ងៃនេះថាខ្លួននឹងចាត់វិធានការខ្លាំងក្លា ប្រសិនបើប្រធានសភាតំណាងរាស្រ្តអាមេរិក លោកស្រី Nancy Pelosi បានធ្វើទស្សនកិច្ចនៅតៃវ៉ាន់ ហើយបាននិយាយថា ដំណើរទស្សនកិច្ចបែបនេះនឹងប៉ះពាល់យ៉ាងខ្លាំងដល់ទំនាក់ទំនងចិន-អាមេរិក បន្ទាប់ពីមានសេចក្តីរាយការណ៍ពីប្រព័ន្ធផ្សព្វផ្សាយដែលលោកស្រីនឹងទៅនៅសប្តាហ៍ក្រោយ។

ប្រទេសចិនបានចាត់ទុកតៃវ៉ាន់គ្រាន់តែជាខេត្តមួយរបស់ខ្លួនរបស់ខ្លួន ហើយប្រធានបទនេះគឺជាប្រភពនៃជម្លោះ រវាងទីក្រុងប៉េកាំង និងទីក្រុងវ៉ាស៊ីនតោន ជាពិសេសការផ្តល់ការគាំទ្រផ្នែកយោធា និងនយោបាយដ៏រឹងមាំរបស់សហរដ្ឋអាមេរិកសម្រាប់កោះនេះ។

ដំណើរទស្សនកិច្ចដែលអាចធ្វើទៅបានមិនត្រូវបានបញ្ជាក់ដោយការិយាល័យរបស់លោកស្រី Pelosi ឬរដ្ឋាភិបាលតៃវ៉ាន់នោះទេ ប៉ុន្តែប្រព័ន្ធផ្សព្វផ្សាយជប៉ុន និងតៃវ៉ាន់មួយចំនួនបានរាយការណ៍ថា វានឹងធ្វើឡើងបន្ទាប់ពីលោកស្រីទៅបំពេញទស្សនកិច្ចនៅប្រទេសជប៉ុននៅចុងសប្តាហ៍នេះ។

អ្នកនាំពាក្យក្រសួងការបរទេសចិន លោក Zhao Lijian បានប្រាប់អ្នកសារព័ត៌មានថា ទីក្រុងប៉េកាំងបានប្រឆាំងដាច់ខាតគ្រប់ទម្រង់នៃទំនាក់ទំនងផ្លូវការរវាងសហរដ្ឋអាមេរិក និងតៃវ៉ាន់ ហើយទីក្រុងវ៉ាស៊ីនតោនគួរតែលុបចោលការធ្វើដំណើរនេះ។

លោកបានបន្ថែមថា៖ «ប្រសិនបើសហរដ្ឋអាមេរិធ្វើរឿងនេះមែន ប្រទេសចិននឹងចាត់វិធានការខ្លាំងក្លាក្នុងការឆ្លើយតបដើម្បីការពារអធិបតេយ្យភាពជាតិ និងបូរណភាពទឹកដី»។

គួររំលឹកដែរថា លើកចុងក្រោយដែលសមាជិកសភាអាមេរិកទៅទស្សនកិច្ចកោះតៃវ៉ាន់គឺនៅឆ្នាំ១៩៩៧ នៅពេលដែលលោក Newt Gingrich បានជួបជាមួយប្រធានាធិបតី Lee Teng-hui នាពេលនោះ៕